ភ្នំពេញ៖ ទណ្ឌិតចំនួន ២៨៣នាក់ ក្នុងនោះស្រី ២៧នាក់ ត្រូវបានក្រសួងយុត្តិធម៌ លើកសំណើជូននាយករដ្ឋមន្ត្រី ដើម្បីស្នើសុំលើកលែងទោស និងបន្ធូរបន្ថយទោស ក្នុងឱកាសទិវាជ័យជំនះលើរបបប្រល័យពូជសាសន៍ ៧មករា ឆ្នាំ២០២៣ ខាងមុខ។

តាមរដ្ឋលេខាធិការ និងជាអ្នកនាំពាក្យក្រសួងយុត្តិធម៌លោក គឹម សន្តិភាព បានឱ្យដឹងថាក្នុងឱកាសទិវាជ័យជនះលើរបបប្រល័យពូជសាសន៍ ថ្ងៃទី៧ ខែមករា ឆ្នាំ២០២៣ ខាងមុខនេះ គណៈកម្មការជាតិពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោស បានបញ្ជូនសំណើដល់នាយករដ្ឋមន្ត្រី ដើម្បីពិនិត្យ និងសម្រេចស្នើសុំព្រះមហាក្សត្រផ្តល់ការអនុគ្រោះទោសដល់ទណ្ឌិតសរុបចំនួន ២៨៣នាក់ ក្នុងនោះស្រី ២៧នាក់។

ការស្នើសុំការលើកលែងទោសនោះរួមមាន បន្ថយទោស៣ខែ ចំនួន ២១៥នាក់ (ស្រី ១៧នាក់) បន្ថយទោស ៦ខែ ចំនួន ៥៤នាក់ (ស្រី ៩នាក់) និងបន្ថយទោស ៩ខែ ចំនួន ១១នាក់ ព្រមទាំងការបន្ថយទោស ១២ខែ ចំនួន២នាក់ ក្នុងនោះដែរក៏ស្នើលើកលែងទោស ចំនួន ១នាក់ (ស្រី ១នាក់) ។

គួរបញ្ជាក់ឱ្យដឹងដែរថា ចាប់តាំងពីឆ្នាំ២០២១ មកកម្ពុជាកំណត់ការបន្ធូរបន្ថយ និងការលើកលែងទោសចំពោះទណ្ឌិតត្រូវកំណត់អាចស្នើសុំ ៥ដង ក្នុងមួយឆ្នាំ ដោយធ្វើឡើងនៅក្នុងឱកាសនៃពិធីបុណ្យជាតិ ឬព្រឹត្ដិការណ៍ធំៗ ដូចជា ទិវាជ័យជំនះលើរបបប្រល័យពូជសាសន៍ (២) ពិធីបុណ្យចូលឆ្នាំប្រពៃណីជាតិ ពិធីបុណ្យវិសាខបូជា ពិធីបុណ្យឯករាជ្យជាតិ និងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក៕